მატჩების ჩაწყობა, ბანდიტები, 3000 დოლარი... - რუსმა მეკარემ საქართველოში გატარებული პერიოდი გაიხსენა

2018 წლის სეზონში ფოთის "კოლხეთის" შემადგენლობაში რუსმა მეკარე დენის კნიგამ 13 შეხვედრა ჩაატარა ეროვნული ლიგის ფარგლებში. ლეგიონერი მეკარე არც ისე ცუდად გამოიყურებოდა, თუმცა მას შემდეგ აღარსად უთამაშია და საფეხბურთო კარიერაც დაასრულა.
 
კნიგამ რუსულ საიტ sportsdaily.ru-ს ვრცელი ინტერვიუ მისცა და საქართველოში თამაშის პერიოდი გაიხსენა, ყურადღება კი თამაშების ჩაწყობაზე გაამახვილა.
 
კნიგა ფოთის "კოლხეთში" 2018 წელს თამაშობდა და 13 მატჩში მიიღო მონაწილეობა. აქედან 3-ში კარი მშრალად შეინახა.
 
"კოლხეთი"...
- დიახ, მე საქართველოში თამაშს დავთანხმდი. თუმცა შემდეგ გაირკვა, რომ აგენტი ქართველებთან იმაზე მოლაპარაკებულა, რომ მე თამაშების ჩაწყობაში მივიღებდი მონაწილეობას.
 
ოჰო. ამის შესახებ როგორ გაიგე?
- აგენტს ვიღაც ადამიანთან ჰქონდა კონტაქტი. ის კლუბის გარშემო ტრიალებდა, თუმცა წარმოდგენა არ მქონდა, ვინ იყო, რას წარმოადგენდა. მოდიან ჩემთან ვიღაცები და მეუბნებიან: "დროა, ხვალისთვისაა საჭირო", მე კი ვუპასუხე, რომ ამას არ ვიზამდი. ის ტიპი კი იწყებს ახსნას: "ეს მე მოგაწყვე გუნდში. ჩემ გარეშე შენ აქ არ იქნებოდი!". მე კი ვეუბნები, რომ "საერთოდ არ გიცნობ!" გუნდის რუსი მოთამაშეები გაკვირვებულები იყვნენ, მეუბნებოდნენ, რომ ეს "სერიოზული პიროვნება" იყო საქართველოში.
 
- ბანდიტები?
- რაღაც მსგავსი. შემდეგ ვნახე, რომ რამდენიმე მატჩში "კოლხეთის" ფეხბურთელები ღიად მანიპულირებდნენ. იქ სრული ანარქია სუფევდა. აი, მაგალითად. მივდივარ შეკრებაზე და ერთი მწვრთნელია, ორი დღის შემდეგ - მეორე. და იცით, რა? 1 საათის შემდეგ გაათავისუფლეს. მესამე დანიშნეს, იტალიელი. მან დაიწყო მომზადების ახალი პროგრამის დანერგვა, ჩვენ კი უპატრონოებივით ვიყავით - უფორმოდ, ეკიპირების გარეშე. ზოგი ჯინსებით მოდიოდა ვარჯიშებზე, ზოგიც შორტებით.
 
- გუნდს მხოლოდ გარიგებული მატჩებისთვის ინარჩუნებდნენ?
- არ ვიცი. როცა მე მივედი, 6 ფეხბურთელი თამაშის გაყიდვაში დაადანაშაულეს. ყველა მათგანი გაუშვეს გუნდიდან. მე სათამაშოდ ჩავედი და ჩასაფრების ობიექტად ვიქეცი. თუმცა, მაინც კარგად ვითამაშე, რამდენჯერმე ტურის საუკეთესო ფეხბურთელად დამასახელეს. ჩვენ შეგვეძლო ლიგაში დარჩენა, რომ არა...
 
- გარიგებების ორგანიზატორები?
- დიახ, ჩვენ შეგვეძლო ადგილის შენარჩუნება, რომ არა ხელმძღვანელობა. მე-2 ადგილს ქვევით მყოფ გუნდებთან არ ვაგებდით, მოგება-ფრე. გასავარდნი ზონიდან ამოსასვლელად 2 ქულა გვრჩებოდა და შემდეგ უკვე ყველასთან წაგება დავიწყეთ. ავიღე პენალტი, შემდეგ გოლი გავუშვი ბოლო წუთზე. ამის შემდეგ ჩავალაგე ჩემოდანი და წამოვედი სახლში.
 
- შენ ხომ იცოდი, რომ გარიგებებში მონაწილე გუნდი იყო. შენ წინ მცველები თამაშობენ, რომლებსაც გაყიდული ჰქონდათ თამაში. შენ რატომ არ არკვევდი, ვისი ნდობა შეიძლებოდა?
- როგორ არ ვარკვევდი? ამის გამო ერთხელ ავტობუსში ვიჩხუბეთ კიდეც. მე რას შევცვლიდი? მე ლეგიონერი ვიყავი, მათ კი თავიანთი სისტემა ჰქონდათ.
 
- უარი გეთქვათ თამაშზე. აგეხსნათ: "არ მივიღებ მატჩებში მონაწილეობას, როცა მცველები გარიგებულნი არიან"...
- ღიად არავინ ყიდდა თამაშებს. მცველი უშვებდა შეცდომას, ვეკითხები - "ეს რა იყო?" ის კი მპასუხობს, რომ ყველაფერი კარგადაა. არავისთან არ მილაპარაკია.
 
- ის "სერიოზული პიროვნება" რამეს შეგპირდა გარიგების სანაცვლოდ? თუ, "ვალდებული" იყავი კონტრაქტის გაფორმების გამო?
- 3000 დოლარს შემპირდა 1 თამაშზე. მე უარი ვთქვი. მივწერე ჩემს აგენტს - "ეს რა ყ...ობაა? სად მომიყვანე?" მან მიპასუხა, არ ინერვიულო, უბრალოდ არ დათანხმდეო. ამ დროს ვფიქრობ, სად მომიყვანა...
 
დენის კნიგა

მსგავსი პოსტები

მატჩების ჩაწყობა, ბანდიტები, 3000 დოლარი... - რუსმა მეკარემ საქართველოში გატარებული პერიოდი გაიხსენა